ســـــــــكـــــة الــــقـــــدر

ســـــــــكـــــة الــــقـــــدر
..القصيد الملحمي الذي يروي قصة حدثت للإنسان. أسلوب سرت فيه وكتبت فيه عدة قصائد وهذه إحدى القصص.. سكة القدر..وان رأينا أو قدمت وأخرجت للناس قصيدة الضحية " انظر ص 70" فإن هذه القصة كانت قبل قصيدة الضحية ويحدث في قصائدي أن تشتهر قصيدة أقل مستوى من سابقتها لأني قد أقدم واحدة لظرف أو لقصد.. وتبقى الأخرى تترقب: هذه القصيدة بعنوان: سكة القدر- مأساة عاطفية كادت تؤدي بصاحبتها إلى الجنون لماذا؟ لأنها بعد بناء العش والحلم وقبل الوصول تلعب يد الإنسان في فشل المشروع ويضيع ا لأمل نهائيا ..لقصة واقعية وأهلها أحياء.. ترجتني هذه الفتاة أن أكتب لها قصيدة فكتبت هكذا تعبيرا عن إحساسها وشعورها لأني شاعر يحس بوجع الإنسان وارتديت نفسية أنثى وضعت هذه القصيدة كما حدث في الواقع تماما-

نصـــر بــنــحــامــد الـعـــويــنـي













بسم الله الرحمان الرحيم
سكة قدرنا تكسرت باليــــــــــــد والعب بيها الريــــــــــــــــــــح
وعبنا على المكتوب كيف فســـد بليل الهوى مجاريــــــــــــــــح
************
عبنا على المكتوب وقت القـال تقلبت بارياح البشري اتعـــــــل
وفيه لوله كان الفرح حفــــــــال وكل المسارب حفلت بالفـــــــل..
وسقم ثنايانا فتل احـــــــــــــبـــال.. يعني سلالم والثنيه جبـــــــــــــل
وقلنا طريق وصولنا يسهـــــــــــال اعقد حبلنا محال ما تنحـــــــــل
وقلنا بنينا العش في الاظــــــلال.. بينه النسايم في حفيف الظـــــل
نقشناه في مغاور أقوار اجبـــــال يصعب على الحساد كيف اتطــل
وقلنا على الحداف ذا محـــــــال.. عليه الحجر يرجع ولا يوصـــــل..
ممنوع عالشيطان والختـــــــال.. والي ختل مااقدر باش وصــــــل..
ايحاكيه كان البدر وقت كمـال.. ويبقص عليه الفجر كيف ايهـــــل
وينغم عليه الطير في التجــوال بجوانحه ايمروح تحية خـــــــــــل..
لفتناه شور الشمس طول اقبال وشور الصلاه والبيت ليه أمــــــل
ببركة ا لمولى والنبي في الفال.. وبركة أصحابه الطاهر ين الكـــل
واحرقت مغرف ملح عالأقفـــال وعلقت مجموعه على لقبــــــــــل..
وحطيت برمه عالسطح في الحال.. وراسين بوكشاش فوق حبـــــــــل..
وآياتها الكرسي خطوط اطـــــوال تجعل عيون الحاسدين اتــــــــــذل..
وظنيت قرب الفرح عيد أجيال.. اتجي قصتي موضوع ناسي الكــل
وشبهت قصتنا أفلام اخيـــــــال في عصر ضاع الحب منه كمـــل..
تخايلت روحي لابسه لفــــــــوال VOWAL وحسبت باب العرش ليه انحــــــل
انقطعت الحلمه صارلي زلـزال.. استاعيت نلقى العمر مني رحــل
استاعيت مالصدمه على هالحال.. نلقى الخديعه طعمها يقتـــــــــــــل..
ومنك اشربت الدمع بالفنجـــــال.. وشربتني حنظل خلوطه خــــــــل..
وبعدتني عالخط ست آميـــــــال.. وفي نص سابع ميل عقلي انــــشل
ورميتني مابين زوز أجبـــــــــال وحدي بقيت انصيــــــــــــــــــح..
وحدت السكه والقدر شحيح..
سكة قدرنا انعيدها وانعـــــــيد.. وانقولها والناس تسمع منـــــــــــا
والي انجرح ماولازمه التضميد علاش تبرى علته يتهنــــــــــى...
ونحكي بهم الصارلي ترد يـــد.. وصمدت رغم الوجع دايرغنـــه
كيف ماصمد صومالنا وعيديد.. تحديت قوة طاغيه في اهلــــــــنا..
وشكيت للنجمات في التهويــد.. ليلي سهر والجفن ماقفلنــــــــــا


وبكري انتمنى فيك درتك قيــد رفيق عمر ياما القلب بيكم غنى..
وفارس أحلامي في نهار لهيد.. وراك المحافل عرس طبله ورنـه..
وراجيتك ورجيت في مواعيد.. ملهوف قلبي بموعدك يستنـــــى..
ويوم انتلاقينا شبيهة عيـــــــد.. اضحكنا وقلنا للهد ف وصلنــــا
ولمت أحضاني وليد شدت ليد جبدتك لصدري للحنان وحنــــه..
ولولا الفضيحه انهزها زغاريد ونرقص احزامي الولبه يثنــــــي
ويكفي رقص قلبي وربي شهيد ويكفي شعوري فايضة تتغنـــــى..
ويكفي الثوب اللابساته جدـــيد ويكفي أصباعي امخضبه بالحنه
وهزمتني ظنك هزت الصيـــد.. افت هزمت الحب فرض وسنــه..
واحرقت شوش الورفي عناقـــــــــــــــــــــــــيد.. مشت مرحله مالعمرضاعت منا..
وبالحق والتثبيت والتأكيــــــد من ربنا تحرم عليك الجنـــــــه.....
ودمع الولايا ايحاسبك ياريــد يكفي دموعي سابحه تتنقــــــــى
ويكفي القدرفي الصفع كان عنيد عوض الفرح شطيـــــــــــــح...
تانربحوا لن صادنا الربيح..
يكفي القدر اكسر ما تمنيـــــت وحرت القدر علاش دار الفتنه
وكسر مراكبنا مشت تشتيـــت اغرق الشقف وسط الغريق هبطنا
وحليت عيني القيت ياما القيت ذكراك بركه نغصت حالتـــــــــــنا..
اذكرت أول فيك مالقيـــــــــت أول لقاء في ..... في قصتــــــــنا
ولاقيتني مع كمشة بناويــــــت وافررتني والحظ من قرعتــــــنا
وجالستني ومعاك طول حكيت بشعور قلبي وعاطفه هزتــــــــنا..
وسهيت ما حسيت بالتوقــــــيت لحظه عجيبه وجهت لحظتـــــــنا..
وصدرك لصدري نجبده وضميت حسيت دار الكون في وقفتنــــــــا..
واضحكتلك واضحكتلي وزهيت.. وضحكوا نجوم الليل من ضحكتنا..
وبديت في تاريخ عمر بديــــت تاريخ باب العشق كي خططــــنا
وريت القمر وجهه انغسل بالزيت وريت النخل فارح مع فرحتـــــنا..
وروحت فكري امشغشبه تبهيت شوي وغديت الدرب عل حومتنا..
وكل من عرضني فارحه حييت.. يار ب بارك في العمل غايتـــــنا..
عرضني السايل فارحه مديـــت وطلبت دعوة خير عل خطوتــنا
وعديت ليلي أفلام وجهك ريــت وطيفك بدالي شبح في نومتنــــــــا..
والنوم هاجرني بقيت بقيـــــــت أني والكواكب والقمر سهرتنــــــا
وضوى القمر من النافذة طليت طل هل يشقرش صبحلي فتنــــــه..
ورقصت أملاك الحب كيف نشيت.. وفوح أصخاب القدر في ليلتـــــنا
وقعدت ليلي ساهره غنيــــــــــت.. مع المطربه نجاة في آهتـــــــــــنا.(عيون القلب)
عيون قلبنا سهرت وما غفيــــــت.. وطال السهر عين الكرى ماجتــنا..
وخفت العواصف درت صدرك بيت.. فيه نحتمي مالعاصفه الياجتــــــنا..
توهمت صدر ك في الزمن عنتيــت.. قلعه حصينه حاميه ترعتـــــــــنا..
طاحت القلعة وانقلب الحيــــــــــط.. وظهرت خديعهواضحه فجعتنا..
وحبست النحله وانقطع الخيــــــط ودارت بعكس الدور في دورتنا..
انقطعت النشوة بعدما نشويـــــت وطف.. انقطع اللحن عل غنوتنا
وانت الصنعت الشمع وانت ضويت وانت الطفيت الشمع في ظلمتــنا
وريح القدر عاكس على مانويـــــت والحب صار ذبيـــــــــــــــــــــح
وتبدا المناحه انواصل التنويح... وسكه قدر نا..
تبدأ المناحه ويحضر النـــــــداب وتبدا مناحب حزن وانــــت داري
وانت السبب في وجعنا والأسباب سيبت دمعي مالمجاري جـــــاري
وسكبت دمعي صب كالميــــزاب تشهد عليه محارمي وبنــــــواري
وتشهد مخدة بللت الأجنـــــــــاب كانها ثراء اتنبت مقابس نــــــاري
وتشهد علي صورتك في اكتاب مزقت كاغطها لصق في أظفاري
ويشهد علي جواب فوق جـواب وحروف كانتلي شموع أنـــــواري
وياما تمنيت الفرج يطـــــــراب يوم فرحتي من وعد من سمســاري..
وظهرت تاجر الغرام الــــــذاب والحب سلعه ماشراها الشـــــاري..
وفي خريفنا ظني المطر صباب تروى بساتيني وورق نــــــواري..
طلعت غمامه سحابنا قـــــلاب ووعود زفزفنا نسيف الـــــــواري...
وياما طلبت من العلي الوهـاب ايثبت خطاوي ايسهله مشــــواري...
ووقفت عند الفجر في المحراب وصليت فرضي والهدي عالبــــارى
وحضرت في جهازي حريرا رطــــــــــــــــاب.. وعشره دبابز عطرنوع قمـــاري
وظني حبيبي اللبستي رغاب حضرت قوفية مع السفســـــــاري..
وعل كيف كيفه مارجي طلاب هو الملك بدني غليف وعـــــــــاري
وهو الملك قلبي وملك للبـــــاب وهو الملك قلايعي واســــــــــواري
أني جاريه في حضرته تنصــــــــــــــــــــــــــاب اتمد القدح تسقيه بين سهــــــــاري
وشراب يحلى من شفر لـــــهذاب وشراب خمري شفايفي واشفــــاري
وياليل طول والقمر عالبـــــــــاب ويافجر سطع نور بين فجــــــــاري...
ويا صبح طير هالحمام اســــراب ايمروح ايفروح فرح فوق ادياري..
واخترت فرقه فنها طـــــــــــراب والحانها اتناغم عزيف أوتــــــاري..
واخترت شاعر قطب من الأقطاب واد عوم يقلب ظاهري وجفــــــاري
نصر العويني الشاعر القبقـــاب ايشطح عقل الجاهله والقــــــــــاري..
صلاة النبي واحجاب بين أصخاب وعين الحسد ترمد بجاه البـــــــــاري


لكن ظهر ربيعنا مجـــــــــــــداب.. وجفف جناين من خصيب خضــاري
اشقلب زرم الحلم كالمشهــــــاب.. استاقطت نلقى الكذب عندك عـــاري
وطلعت صلاة امامنا الكــــــذاب اثرنه غرام الذيب ناب ضــــــــواري
ابليس بايعك بالزوز ياقـــــــــلاب شطحلك ابليس ورقصلـــــــك دواري
وظهرت تاجر في الغرام ال ذاب والحب سلعه ماشراها الشــــــاري
النصاب باطل فيه قلب احبـــــاب ووعود زفزفها نسيف الـــــــواري
ويوم التفارقنا صباحه ضبـــــاب من صبحته غشى الضباب أشفاري
وظهر عل وجه الصباح غـــراب وفي جرته غربان فجعـــــت داري
وسلمت أمري لخالقي الوهــــــاب ومسحت اسمك مسح من تذكـــاري
وموعود عند الله ثم حســــــــــاب ياراكب دراجيــــــــــــــــــــــــــــح
ضربة قدر عالغدر ليك اتميح
شيحت تو اتشيــــــــــــــــــــح وجرحت لازم تاخذ التجريـــــــــح
والله ليك ايعــــــــــــــــــــــــد حفرة صهد تصهد يا مرتــــــــــــد..
وسكة قدرنا تكسرت باليد ................%

نصـــــر بنحامــد العويـــني
أبــــــريـــــــــل 1991