lundi 25 août 2008

البشـــــــــــرى

البشـــــــــــرى *

ريحـي وريــح منازلي وماضــي ما نــــــيه

ذكراه اتعيشلن لا المكتوب انطاعلي غادي لامنــــــا

ريحي وريح منازلي وبشير ببابـــي بشرني ببشايره في يوم جمعنـــــــــا
وضوّى نوره بان فرحني باحبابـــــي وعدل لي البوصلة بين مرابـــــعنــا
بهمسة درج كلمته قوله رتابــــــــي محلى رنة لغوته بتخريج المعــــنى
وقال تفضل خش هيا خوذ شرابــي بلسم داوى أجراحنا وخف اماجعنا
ودخلت على جرته ليقابل محرابـي ايشع بنور الله في داخل جامعـــــنا
سلامات سلامات يا غيث الصبابي سلامات سلامات يا راويها ترعـنا
وصبت عبت فايضة وروت روابي ونشع لونه أخضار شرهنا ومتعـنا
وبين شبوب الخير ودموعي السكابي نلقى براكه فايضه وللخير رجعــنا
القيت روا يح ند في اجيابي واجنابي وعنبر يغشي ريحته ايعطرطايعـنا
لكن زاير مطراحنا طبعي رحابــي أهلا ومرحبتين يا داخل موضعــنا
ومن عادانا انقولك راه طبطابــــي اشكون ايفك عقايله كانه وجعـــــنا
ومن عاكس مشوارنا ودنس غيابي عليه الرجم سواخطي وعليه اللعنة
ومن جانا في خطوطنا وفي خط أصحابي وليه بشاير كيفنا ويدخل مجمعــــــنا
ويدخل بيك الدايرة وانحل كتابـــي بسم الله مفتاحنا للدرس تبعــــــــــــنا
ووسيط ارحاب الدين رواي حلابى وبين زوايا الزاويه بخوره ضوعــنـا
وفي حضرة الأشياخ زارب حزت منابي وحصلت المرغوب وهاهو الشيخ سمعنا
وكيف دخل أستاذنا الشيخ الدبابـــي نطق اللغة ثابته حيني طاوعــــــــــنا
وقتله هذا سلامنا مشهور خطابــي وجينا وقت الصايبه كيف اتفزعـــــنا
وحاسبني في أخطاي تلقى عد حسابي مدروس ومضبوط لا طرحنا وجمعنا
وسامحني ردية عالمن ثار أعصابي باطل باش اتفيدنا والا تنفعـــــــــــــنا
ولاش كلامك لاش ولسانك هبهابي وكلامك مدهون وفي ظنك تخدعــــنا
نعرف عندك زيف ليك المسرب غابي ومن داخل م شلول ومتوجع مالطعنه
اطمن هان ي انقولك لا امضي نابـي ولاني برزت مخالبي ولانا فجعــــنا
وجيتك باش انصافحك من بعد غيابي وكان عرضت بجفوتك بالله ودعــــنا
وانت التفهم كلمتي وشرحي واعرابي وكل أسباب أشجارنا وكل دوافعـــــنا
ونرجع للموضوع ندخل راس ركابي انعود لراس القافية أول مطلعـــــــــنا
ريحي وريح منازلي لا فاح اصخابي وريح الـــي زارنا...
اليـــــكرفها تيولك محــلى هالصـــــنة...
اليكرفها تي قولك سبحان المولى امنين جبتوا هالريحه عندك ما اطيبها
الي خدمها بخلوطها نضحت معدولـــــــــــــــه كل وقية قدها عنده حاحسبــــــــها..
زعم مالسودان مهدية مرســــولـــــه.. بين مسك وسوسان خلطها جربـــها..
والا بمكه الضاويه بليله مفضولــــه نازل فيها كتاب فات جميع كتبــــها...
صبغها الله بريحة الحبوب رسولـــه وعبر ريح اصنافها وعطرهالبــــها..
ولموها سناكها مجمـــــــــــــــولــــه واعطوها التباعهم منه راغبــــــــها..
ومنهم كان أستاذنا العنده بصكولـــه يعطي بالميزان كل وزنة رتبـــــــها..
اتقولوا نصر دخل في ظلمه مجهولي تركن فيها ليلها وزاد امضببــــــــها
اتقولوا خش غيوم هربت بيه الغوله ورفعاته الأوهام وغبايش مسربـــها
وسكرتله منقالته صارت مزطولــه وما اتفرش كيفاش دوران عقاربـــها
وتذو مل الآذهان في تكبيل غزوله وفي الدغراقه الغارقه اتضيع مسربها
انقولك لا لا قصتي هكه مجعولـــه تسرح بيك الغازها ولاهي تحجــبــها..
الينوي ايخش اقدالها يمشي بسهوله ايسمّل بسم الله وقت الي ايعتبـــــــها..
ايحيّيه البواب في لحظات وصولــه وايحيّي الحجاب كل غرفه بحاجبــها
راه داخل مملكه مرهوبه دولـــــــه رعابه غطاريف لا واحد يقربـــــــها
ويالي جايب عسكره وقوات اسطوله مسكين ومسكين من ناوي يضربــــها
مغرور وغلطان ويله ما أكبر هوله خش اللبه والدة وناوي يحلبــــــــــــها
وهي احذاها صيدها اسيوفه مســـــــــــــــــلوله.. وذرعيه سواخيط مزاقه مخالبها
حيني ير جع طول ماعنده ما ايقوله خايب ظنه خاب وافعاله ما اخيبــــــها..
اخيار الشعر انقولك همه ورجولـــه وصدق عواطف فايضه للي كاسبــــها
اخيار الشعر انقولك لفظه معسولـــه.. ممزوجه باحساسها اتهزي طاربــــــها
اخيار الشعر انقولك في عرضه وطوله.. ايكون بلسم الأوجاع لمراض أي طببها
اخيار الشعر انقولك شمعة مشعولـــــه- تضوي ملك الليل من بدو مغاربــــــــها
تضوي النجمة اتدل الافكار المغسوله الضاعت في متاهات لا انعد مشاربـــها
ومن شعري يا صاحبي حصلت العوله خزين حكم دهور منسوبه لعربــــــــــها
والخاطي الميشاف يوم الهيد خيولـــــه الموش فارس لا ايقودها ولا هو يركبـها
غير الدنيا العاكسه خصايه فحولــــــــه ورقاية خصيان ما نعرفش نسيـــــــــــها
اوباقي القصة امتاعنا اتفسر مدلـــــــــــــــــله الشعر وكل مسالكه اتخش مضاربــها
ومن ماضي روافدي قويه يا لـــــــولا لولا ما اتــــــــــــــــــبدلـــــــــــــــــــــــنا..
ولولا هدم أسوارنا وتهــميش عملنــا...
لولا هدم أسوارنا وتخريب وكــــرنا وبتران مقاصيدنا في كل ثنيـــــــــــــــــة
ولولا افتان نجوعنا وكثرتنا حرنــــا وفي تلويث أفكارنا وفساد النــــــــــــــية
وفي تهميش أبصارنا وتقصير نظرنا اندهبت حتى اشوارنا وسط العـــــــــــمه
وضاعت منا دروبنا وليل امحاصرنا وسرنا بين دوامسه بشمعه مطفـــــــــــيه
وما بين دغاريقها رانا تكوخــــــــرنا صار مسلك مفقود وثنايا وهمـــــــــــــيه
اطمنا بآمان وأملت ايذخــــــــــــــرنا وذخاير عولات في الزمه المعشـــــية
وحسبنا هالحيط يحمينا في اقررنـــا لن جتنا في مغاغره ثعبان وحيـــــــــه
ذقنا خدعة جارنا والي جاورنــــــــا اسمم حتى كلامنا بلغه سوقيـــــــــــــة
تلوث طعمة قوتنا بناتل نادرنـــــــــا جت اللقمه فاعشه مخصوصه نيـــــــة
وعوض نضوح زيوتنا شربنا مالقرنه امدردر بالمرجين في عقاب الشامـــية
وتنقولك ياصاحبي ربي ايصــــبرنا ضعنا وضاع امامنا صلاته ملغيـــــــه
وماهو كان ايمامنا بذكر ايذكرنــــــا بواجب كنا ليه رغابه للديـــــــــــــــــه...
وكان معاه خشوعنا اتذل كواســــرنا وايروض في وحوشنا وسط البريــــــه
ووقت الغاب وراح في لحظه وخزنا وصدينا عالخير ضاعت كل هـــــويــه
وتباكوا نساكنا بين حواضرنــــــــــا جوعهم عربيد في ليله شتــــــــــــويـــه
وقلقهم ملقوط من نسل مواخـــــــرنا والد في ماخور وامه هي بغـــــــــــيـــا
آه كنا وكان ساس العلم شهــــــــــرنا وبركلت من الله وخطاوي قدســـيـــــــة
وكان الغيث ايصب في مدنا وادشرنا وكان خصيب زروعنا ترعه مـــــرويه
وكانت بركه صافيه وفرحه تغمرنـــا وحتى أيام أفراحنا لياليها هنـــــــــــــية
وانقلبت الأرياح لا يوم استنـــــــفرنا ولا اقسمنا المقسوم بين البين رزيــــــه
صار الشعر قبيح في لحظات سهرنا وهذا ينفخ فخ كاللفعه الملويــــــــــــــــه
وهذا دربز خطوته وقال تبخـــــترنا وهذا يفخر قالك وحدي في الجيـــــــــــه
وهذا يفخر قال هانا هانا هـــــــدرنا وقال عندي صواريخ وقنابل ذريــــــــة
اترواه وينه الصاروخ الي يضرب غادرنا امنين طب الطيار عالبرج السدريــــــــة
ومهازل يا ناس فوق الي تصــورنا بزخاريف الزيف داروها ســــــــــهريـه
وتعرف بالتزميرقداش زمامــــــرنا وقالو أنغام الجد وغناوي شعبـــــــــــيــه
وتعرف بين ديارنا اكبار بنادرهــا لاهم مالفقراء لا ارجال الصوفيــــــــــه
ووين ايدور الريح ايقولولك دورنا ايميحوا مع الأرياح شرقية وغربيـــــــه..
وكل حوه في لون تبديل مناظرهــا وحسب الآلة يعزفوا بنغمه فنيـــــــــــــة
ومن جلد اتلحرباءتبيضنا واخضرنا حسب ألوان العود دفله وترنجيــــــــــــة
وآ ش كثرت الألوان يا ربي تسترنا زخرف بان خلوط عاللون الزربيــــــــه
وحالي وحالك حال مازال ايكدرنــا هكه اتصيرمنازلي وانروح ضحيــــــــه
وحاير غير أستاذنا طل وبشـــــرنا عطانا بعض أقلام مساحة الأميــــــــــــة
وأعطانا شمعات في الليل اتسيـــرنا وقال امشوا في الريح ودوامس مغشيــــه
وعواصف ورعود عله غيث حجرنا ساخط يحيي المات بين ديار خليـــــــــــه
اتنوض الرمه اتصافح سمانا وقمرنا واتعاود تاريخ ليه خطوط قويـــــــــــــــة..
ايطول الليل ايطول واتهيج مشاعرنا وباقي ايطول السير واتطول المرثيـــــــه
وعلاشي الأطيار عقب عويق هررنا تتغــــــــــــنى بالــــــــــــــــــــرنــــــــــه...
رغم نعيق البوم في تراكن منزلنا... وريحي
رغم نعيق البوم في جويه ومدينة نتعوذ بالله من كل الـــــــــــمنكـــــــــــوره...
ورغم طيور الليل ومناظرهم شينــه لا فار ولا طير ما افهمتش هالصـــــوره
لازم طير البازباش اتقابل عينـــــــه وايصلافق جنحيه عاراس الطنـــــــقوره
هاهو الطير الحرفي غبنه وغبيـــنه ولغراب الملعون متنعم بســــــــــروره ../..
..ايعيش الليث حقير في حالات حزينة والثعلب في خير بين أرياش قصـــــوره
ولونبكوا بأوجاع لا حد ايواسيـــنــا ولو فيدي قنديل حيني يطفوا نـــــــــــوره
تحملنا ومازال ما ندروا لياتينـــــــا وصابرين على حال والدمعة مقطــــوره
شوف الدهر ايبيعنا والا يشريــــــنا وشوف أفلاك الله وآش تعمل في الدورة
وشوف الكتيه حجمها ياما يرويــــنا والا ايزيد ملوحها من وسط بحـــــــوره
يا ما صبرنا كم عدينا وعدينــــــــــا وزرعنا في اسباخ لكن هاهي بــــــــوره
غسلنا ذيول كلاب ما نحوا النتيــــنه وقلنا هوذا اينعوا غريق البحبـــــــــــوره
وظنينا هالحوت متخبي في درينــــة طلع نقيق جران في قعر القجـــــــــــوره
وظنينا هالفارس بوهره يحميــــــــنا طلع راكب مقلوب عالجحشه مدبــــــوره
وظنينا هالرايس الي ايقود سفينــــــه ايمنعنا في النو لاكن تلف شـــــــــــــوره
وسامحنا يا شيخ اليا اجهلنا قرينـــــا راني ضايع ليل في مدينة مخمــــــــورة
راني طير شريدوانحوم في جنيــــنه لمسها لون ربيع زينها بخضــــــــــوره
وانحوم عالزاويه فيها تركينــــــــــه وعزله عالمخلوق كاثر فيه شــــــــروره
وانحوم عالأم في السنوان حنينـــــه وعواطف وأوناس في الليله المغتـــــوره
وانحوم في صديق لا فيه التخوينه لا هوشي خوان لا يخوي عالـــــــــدوره
وانحوم في جار وناس جوارينـــــه حصين الدار أمين وأفعاله مشهــــــــوره
نطق الشيخ بقول في كلمات رزينه قال امشي لا اتخاف خطك بين شـــــوره
وتوانزورك يوم في موعد لاقينــــا بسلامه عالخير ودعني بعطــــــــــــوره
عاطر ريحه وريحتي بورده وياسمينه ريحـــــة بـــــــــاب الجـــــنـــــــــــــــه..
اللهـــــم يا خالقــــــي ليــــــها اتدخلـــــنا..
ريحــي وريح منازلي وماضــي ما بـــــنه..

شــــعـــر: نصر بنحامــد العويني



Aucun commentaire: